使命
老實做,先至做得大。
喺一個成日鬥賤、靠黑工壓價嘅行業入面,揀老實、企硬價,把呢套做法寫成標準——先可以帶多啲人成長,再行出去更多地區、國家。
我哋點解要老實
上善服務唔係一開始就諗住做清潔。
初初冇經驗嗰陣,想揾人做嘢,聽得最多嘅一句係「搵你阿媽做啦」——呢行本身就冇乜斯文可言,粗聲粗氣、藍領到核心,冇資歷,就預咗畀人睇低。
仲要捱嘅係——市場入面成班黑工、走盤菲傭低價接私活,將個價壓到完全冇得做落去嘅水平。呢行嘅「水深」,唔淨係手法唔老實咁簡單,連生存嘅價錢都畀人做爛咗。
就係喺呢種環境,公司成立半年,就接咗第一張政府單——冇乜資源,靠嘅淨係「唔呃人、老老實實做」嚟攞信任。中間都行差踏錯:開過間麵館,蝕錢即刻止蝕轉讓,冇拖泥帶水。學識一件事——認低威唔緊要,最緊要繼續老實做落去。
由「搵你阿媽做」,捱到接大學宿舍、領事館嘅單。
5年後,團隊不斷壯大,覆蓋全港各區。依家我哋做緊嘅,係將呢套「老實」寫成一套企業標準——唔靠一個人撐,而係一套流程、一套制度,無論邊個執行都做得到,亦都唔使同人鬥賤鬥爛市。
標準化做穩之後,我哋想帶更多人成長,再將呢套做法帶去更多地區、更多國家。
里程碑
「呢個系統嘅第一張單」
用緊呢個新派工系統嘅第一張真實訂單，就係一個唔簡單嘅job：3人4小時全屋清潔，加埋額外兩位師傅嘅拆衣櫃棄置服務。師傅到場先發現屋企有大量老鼠屎，仲有死老鼠。但我哋冇臨時話「太污糟」要加錢，亦冇縮短服務內容——照樣喺原定時間內，完成晒成個工作。
上門師傅
自營清潔團隊
真實合照,同你將會見到嘅人一樣。
點解清潔我哋堅持自營?
清潔係「登堂入室」嘅服務,師傅會喺你屋企逗留幾個鐘頭,接觸你最私人嘅空間。所以上門清潔嘅師傅,全部係上善自己聘請、自己培訓,唔外判、唔轉介畀陌生人。你見到嘅,就係穿上善背心嘅同一班人。
- 保險
- 僱員補償保險
- 昆士蘭聯保保險有限公司 承保
- 賠償限額
- HK$200,000,000
- Limit of Indemnity
- 承保地點
- 香港任何地方
- 具體保障範圍及條款以保單為準
願景
有一日,無論喺邊個城市搵到「上善」,你都應該攞到同一種老實、同一種質素——同埋,有更多由呢度出發、捱出頭嘅人。
🤝
老實
唔取巧,價錢、流程、質素都攤出嚟講清楚。
📐
標準化
唔理邊個師傅、邊個地區接單,體驗都應該一致。
🌱
共同成長
帶多啲肯學、肯捱嘅人,一齊行得遠。
跟進我哋