老實做生意
我哋點樣做生意
想你落單之前,就知道會被點樣對待。以下係我哋公開嘅承諾,有做得唔夠嘅地方,歡迎直接話我哋知。
承諾 1
落單前見總價,範圍寫清楚
報價會列明計價方式、包含同不包括嘅工作。附加項目、即日或夜間加收、最低消費、優惠碼,全部喺你確認前睇到。未列明、未經你確認嘅費用,唔會事後追加。
承諾 2
現場要加項目,要你同意先做
師傅到場如果發現報價以外嘅工序,會先講明喺邊度、要做咩、幾多錢,你確認咗先做、先收。工作人員無權喺現場自行改價,我哋亦唔會單憑「現場較污糟」就加價。
承諾 3
有問題,一個工作日內有人聯絡
服務完成後,你可以喺訂單頁提出問題(可附相片)。收到後,職員會喺 1 個工作日內聯絡你跟進。工作日指星期一至六(公眾假期除外),以服務時間 09:00–20:00 計,遇上惡劣天氣會順延。「聯絡」指職員首次回覆你,詳細處理會核對後再同你商量。
承諾 4
有問題逐個個案處理
我哋會核對訂單同服務紀錄,按報價單同實際情況同你商量跟進方式,例如補做、部分退款或其他安排,以《服務條款》同你確認嘅報價單為準。
點解鐘點清潔有最少人數同鐘數?
家居清潔最少 2 人,係為咗你同師傅雙方嘅安全同信任。最少鐘數,係因為我哋冇將派單、通勤同交通成本另外計落你度,先可以維持而家嘅價錢。我哋寧願一開始就寫明規則,都唔想先講平價、之後逐樣加。
我哋做唔到、唔包嘅嘢,都講清楚
- 鐘點清潔按時數計,時間內優先做你列出嘅項目,唔保證做齊晒。落單前報價頁已經寫明。
- 實木地板暫不承接,複合木地板按現場狀況評估。
- 服務只限香港,港島、九龍、新界全區。
- 特殊物件(例如石地去油、紅油漆清潔、傢俬棄置)按相片由職員報價,唔會硬塞一個一口價。
以上承諾以《服務條款》同你確認嘅報價單為準。我哋為咩咁堅持,可以睇我哋嘅由來。