自由工作者使用教學
由申請到接查詢,6 步睇晒
呢份教學適用於個人店舖。申請不代表通過,亦不保證有訂單,服務地區只限香港。
1提交申請
去自由工作者申請頁用幾句講你做咩、做咗幾耐,再揀類別。作品連結同補充資料係選填,寫得多審閱會更快。之後我哋會審閱資料,有需要先聯絡你面試,通過後再安排少量試做單。
2登入店主後台
帳號係邀請制。開通後你會收到電郵,然後去店主後台輸入同一個電郵,再輸入 6 位數驗證碼就登入到,唔使密碼。驗證碼 10 分鐘內有效,收唔到請睇埋垃圾郵件。
第一次登入要先閱讀並同意店主條款。
3填店舖資料
喺「店舖資料」填店名、一句介紹、簡介(最少 20 字)、服務時間同服務地區,再撳「儲存並提交審核」。只寫真實經驗同可以驗證嘅內容。店舖資料經審核先會公開。
4上載作品相
喺「相片」分頁上傳到相片庫,之後就可以揀去店舖相簿(最多 12 張)或者服務(最多 8 張,第一張做封面)。只放你本人擁有或者已獲授權嘅作品、工具或場地相,唔好放人像、客人資料或者證件。相片要審核通過先會公開。
5用一句話開服務
喺「我的服務」撳「+ 新增服務」,用一句話寫你做咩、包幾多、幾錢、去邊度,例如:
租盤攝影,一個鐘,15 張精修,$800,港島九龍
撳「幫我整理」後,系統會預填服務內容。請逐項檢查,特別係包含、不包含、驗收方式、修改/補做同取消安排,再提交審核。想自己逐項填,可以撳「手動填寫」。
6回覆客人查詢
客人喺你嘅店舖頁留低聯絡資料後,查詢會同時寄到你電郵同後台「查詢」分頁。請盡快直接聯絡客人,確認時間同內容,再標記「已聯絡」、「已成交」或者「冇成交」。客人資料只可以用嚟回覆該查詢。
常見問題
保唔保證有單?
唔保證。上善提供展示同推廣,有冇查詢視乎客人需要同你嘅表現。
使唔使俾錢?
個人店舖目前免費展示。商戶收費會喺生效前通知。
客人點樣俾錢?
個人店舖由你同客人直接交收,付款、退款同糾紛都由你同客人處理,平台唔經手款項。
我係上善僱員嗎?
唔係。你以獨立身份使用平台,稅務由你自行負責;如果你經營業務,要依法辦理商業登記。
要唔要自己買保險?
要。你須自行購買適當保險,包括適用嘅第三者責任保險,上架前需要提供保單副本。上善嘅僱員補償保險不涵蓋你。
改價或者改內容要等審核嗎?
價錢喺平台範圍內改會即時生效;範圍外、未設範圍嘅類別,或者內容改動,都要審核。改動審核期間,現有上架版本不受影響。
可以暫時停接嗎?
可以。喺「我的服務」撳「暫停」就會落架,之後可以恢復上架。你亦可以隨時終止使用。
點知有冇人睇我間店?
服務上架後,後台會顯示近 7 日同近 30 日嘅瀏覽同查詢數字。有數字嗰星期,星期一會寄電郵總結,你可以喺後台關閉。瀏覽係約數,只供參考,不代表保證有訂單。
服務未通過審核點算?
喺「我的服務」睇審核意見,按意見修改後再提交。